Ndryshimi fillon me ne: Inspirimi nga punëtoria për vullnetarizmin në Tetovë
- Adrion
- Jul 3, 2024
- 2 min read
Tetovë, 25 Qershor 2024 - Shoqata për Arsim dhe Kulturë Adrion, në bashkëpunim me Parlamentin e Studentëve të UEJL në Tetovë, organizuan me sukses punëtorinë me temë "Fuqia e Vullnetarizmit: Ndryshimi fillon me ty". Ky aktivitet u mbajt në ambientet e Universitetit të Evropës Juglindore në Tetovë dhe mblodhi 34 të rinj, përfshirë nxënës të shkollave të mesme dhe studentë.
Aktiviteti u realizua në kuadër të projektit partner “Zëri dhe pjesëmmarrja e grave dhe të rinjve në: Krijimin e politikave publike dhe krijimin e një mjedisi të favorshëm për pjesëmarrjen qytetare”, i cili zbatohet nga Iniciativa Qytetare e Grave ANTIKO, Shkup dhe partnerët e projektit Shoqata Për Arsim dhe Kulturë ADRION, Zhelinë dhe Shoqata “Gjithmonë Bashkëjetesë”, f. Kanatlarci – Prilep. Projekti është mbështetur nga qeveria zvicerane përmes Civica Mobilitas.
Qëllimet e përgjithshme të kësaj punëtorie ishin të rrisnin ndërgjegjësimin mbi rëndësinë e vullnetarizmit, të nxisnin pjesëmarrjen aktive të të rinjve në projekte vullnetare, të zhvillonin aftësi dhe vlera si solidariteti dhe empatia, si dhe të krijonin një rrjet mbështetës midis të rinjve.
Aktivitetet e realizuara përfshinin prezantime hyrëse, sesione të historive të suksesshme, aktivitete praktike, diskutime të hapura dhe krijimin e planeve personale për veprim në fushën e vullnetarizmit. Përmes këtyre aktiviteteve, pjesëmarrësit zhvilluan aftësi të reja në komunikim, lidership dhe bashkëpunim.
Rezultatet e arritura përfshijnë rritjen e ndërgjegjësimit mbi vullnetarizmin, pjesëmarrjen aktive të të rinjve në projekte vullnetare, zhvillimin e aftësive të reja, krijimin e një rrjeti mbështetës midis të rinjve dhe krijimin e planeve personale për veprim. Pjesëmarrësit dhanë “feedback" pozitiv për organizimin dhe përmbajtjen e punëtorisë, duke vlerësuar mundësitë praktike dhe sesionet e diskutimeve të hapura.
Organizatorët rekomandojnë që aktivitete të tilla të vazhdojnë të organizohen për të përfshirë një numër më të madh të rinjsh dhe për të zgjeruar rrjetin e partnerëve dhe mbështetësve për të ofruar më shumë mundësi vullnetarizmi.
Kjo punëtori ishte një hap i rëndësishëm drejt inkurajimit të të rinjve të Tetovës për të bërë një ndryshim pozitiv në komunitetin e tyre përmes vullnetarizmit.
Women Civic Initiative Antico