Të rinjtë diskutojnë sfidat dhe nevojat për trajnime në Maqedoni

Takim online me pjesëmarrës nga katër komuna

Më 14 tetor 2024, u zhvillua një takim online me të rinjtë e përzgjedhur nga komunat e Tetovës, Strugës, Kërçovës dhe Kumanovës, ku tema kryesore ishte “Nevojat dhe Sfidat e të Rinjve që hasin në komunitet.”

Gjatë këtij takimi, të rinjtë patën mundësinë të ndajnë përvojat e tyre mbi vështirësitë që përballen në jetën e përditshme në Maqedoni dhe të diskutojnë se si sfidat e tyre lidhen me mungesën e mbështetjes së duhur dhe mundësive për zhvillim.

Diskutimi u përqendrua në nevojën urgjente për trajnime profesionale dhe edukative që do të ndihmojnë të rinjtë të zhvillojnë aftësitë e tyre dhe të jenë më të përgatitur për të kontribuar në komunitet dhe tregun e punës. Të rinjtë theksuan rëndësinë e trajnimeve që lidhen me zhvillimin e aftësive personale, krijimin e mundësive për punësim dhe përfshirjen e tyre në proceset vendimmarrëse lokale.

Takimi u zhvillua në kuadër të projektit partner “Zëri dhe pjesëmarrja e grave dhe të rinjve në: Krijimin e politikave publike dhe krijimin e një mjedisi të favorshëm për pjesëmarrjen qytetare,” i cili zbatohet nga Iniciativa Qytetare e Grave ANTIKO, Shkup, në bashkëpunim me Shoqatën për Arsim dhe Kulturë ADRION dhe partnerë të tjerë. Projekti, që ka për qëllim fuqizimin e grave dhe të rinjve përmes pjesëmarrjes aktive në krijimin e politikave publike, mbështetet nga qeveria zvicerane përmes programit Civica Mobilitas.

Ky aktivitet është një hap i rëndësishëm drejt identifikimit të nevojave dhe krijimit të mundësive për zhvillimin e të rinjve në komunitetet e tyre, duke përfshirë trajnimet që synojnë rezultate afatgjata në përmirësimin e jetës së tyre sociale dhe profesionale.